1. Advent

So, scho isch Dezember. Aber da merkt mer nöd so vil devo, chönt grad so guet September si. S Wetter da i de Wintermonat isch herrlich, nöd sooo chalt und recht vil Sunne. Aber leider gits da praktisch au kei Schnee, bzw blibt er nöd ligge. Drum froi ich mich jetzt scho uf de schwizer Winter wo denn no chunt wenn ich wider dihei bin.

Am letschte Wuchenend bin ich ja wi gseit dihei gsi. Ich ha zum erschte Mal am Robert sini noi Wohnig gseh. Am Namittag simer den nach Wollerau und d Sara und de HaJö sind au cho. Denn hets Brezeli und Wädi Bräu Bier ge und mir hend chli gschwätzt. Am Abig hets uf min Wunsch wideremal es richtigs schwizerischs Raclette ge :) Das isch au grad es Vorfüär Esse gsi - ich ha nämlich mini Mitarbeiter i de letschte Wuche zumene Raclette Esse iglade und ha so grad nomal chöne gseh was so alles dezue ghört :)

Nachher hets es Cheminée-Für geh und de Robert und ich hend de Abig uf em Sofa verschlafe :)

Am Sunntig Morge isch denn d Hanna zum Brunch cho, und s het endlich nach 2 Monet mal wider richtigs schwizer Brot ge :) Da gits nämlich nur das weiche, scho gschnittne Brot wo kei richtigi Chruschte het :) De Rescht vom Tag hemer gmüätlich dihei verbracht bevor am Abig de Robert und ich denn wider richtig Züri sind. Det hemer no de Päde troffe wo per Zuefall uf em gliche Zug gsi isch. Am viertel vor 9i bin ich denn uf de Zug richtig Amsterdam, demal han ich en Ligesässel gha und leider nöd es Bett imene leere Abteil so wie uf em Hiweg. Han aber gnau so guet chöne Agath Christie's 'Murder on the Orient Express' lose, won ich vorher extra no uf de ipod glade han :) Am Morge chli nach em 9i bin ich denn in Amsterdam acho und bi direkt go schaffe.

Susch isch die Wuche rel. ruhig gsi, abgseh vo geschter Abig. Det sind mini schwedisch, schottisch und englisch Kolleginne sowie 2 Kollege us Kanada zu mir cho go Fajitas esse (ich ha fürs kocht, will da all uf Prüäfige lerne müänd, nur ich ha amel am Wuchenend nüt z tue :) ). Nachher simer da in Leiden nochli in Usgang. Irgendwo sötts no Fotene ume ha. Ich versuech die ufztribe und es paar online z tue. Leiden het recht vil schöni bars, und i de letschte womer gsi sind het mer au tanze chöne. Es isch uf jede Fall en super Usgang gsi :)