Erste 48 h in den Niederlanden

Mir sind guet am Samschtig Abig in Holland acho, und hend i de letschte 48 h au scho einiges gseh: Delft, Rotterdam und Leiden.

In Delft hämer im Hotel 'Grand Canal' übernachtet. Das isch emal s Stadtgfängnis vo Delft gsi; Di grossi schwäri Isätür und Isästäb i de Fenschter im Erdgschoss erinnered no dra :)
Delft sälber isch extrem schön, sehr altmodisch mit vilne Kanäl, so gnännte Grachte.


Am Sunntig simer denn mit em Zug nach Rotterdam. Mit de Züg isches fascht wie i de Schwiz, nur isch mer no vil schneller überall. Nur eis gits chli z bemängle. Die kenned da a de bahnhöf weder Rollträpe no Lift - kei Ahnig wie da Lüt mit no me Köffere als mir (und mir hend scho z zweite 48 kg gha) oder Lüt mit Chinderwäge klar chömed. Uf jede Fall isch Rotterdam völlig s gägeteil vo Delft. De Hafeteil vo Rotterdam isch unglücklicherwis zur Zit vom zweite Weltchrieg praktisch am Erdbode glichgmacht worde (abgseh vom gröschte Hus i de Stadt - so isches doch immer mit Zile... ;) ) so dass praktisch nüt älter als 50 Jahr isch. Dementsprechend au de völlig anderi Idruck. Rotterdam hät überigens de gröschti Hafe in Europa - Jährlich hät Rotterdam en Güäterumschlag vo ca. 350 Mio Tonne wovo öpe en Drittel Öl isch.

Hüt Namittag simer dänn i mim Appartment acho. Ich wohn da imene Grosse backsteinerne Gebäude usem Jahr 1892. Ich wohn im erschte Stock, zum Kolsteringang i :) Vo mim Fenschter us gseht mer direkt in chline Park im innere vom Gebäude. Das Hotel isch 1892 - 1972 es Spital gsi, und gnau so chamers sich au vorstelle :)