1 month down, 2 to go...

So, jetzt isch also scho de erschti Monet, und somit en Drittel vo mim Praktikum da, ume. Bi de Arbet laufts super, au wenns halt amel chli en Kampf isch mit Programm z schaffe wo no im Entwickligs-Status sind. Ich mach da es UML Modell mit Eclipse-Erwiterigs-Tools, das het da no niemert gmacht. D.h. ich tüftle vil ume und schrib emails, um mich z erkundige wie mer Problem löst, und all sind sehr interessiert a was ich mach, wills ja denn münd wüsse wie ich die Modell gmacht han, wenn ich mal wider weg bin :) Ich has endlich au gschafft e Foti vo es paar Lüt us oisere Section z mache. Au mit uf d Foti hend die 2 boards müässe, wo mir Afangs Monet übercho hend, und uf die di andere denn mini Modell lade wänd um dademit d Projekt-Abschluss-Präsentation z mache. Die beide boards für die Demonstration het d ESA über 75'000 Sfr. koschtet :)

Am letschte Dunschtig simer da go go-kart fahre. Die go-karts sind wahnsinnig schnell gsi, und d Bahn isch e richtigi chlini Hindernis-Bahn gsi. Nur d Lengi-Agab vo de Bahn cha nöd ganz gstumme ha, nach dere wäred mir nämli im Schnitt 60 km/h gfahre :)

Am Wuchenend bin ich denn mal endlich d Düne go aluege. Die sind scho no recht idrüklich, und anschinend gönd da d Lüt wi bi ois am 01.01. im Meer go Noijahrs-Schwümme.

Am Zischtig hemer nach de Arbet echli es speziells Programm gha. Denn isch nemlich d Discovery gstartet um unter anderem en ESA Astronaut und s europäische Verbindigsmodul 'node 2' zur ISS z bringe. Das Modul wird denn benützt um s europäische Labor 'Columbus' a de ISS z befeschtige. 'Columbus' sött Afangs Dezember zur ISS gschickt werde und isch natürlich öpis wodruf all fiebered.

Am letschte Fritig hets es französischs 'breakfst' bi de Arbet ge. Ein Franzos het Brot bache, und de ander het Muscat us Korsika, Salami und Foie Gras (ich weiss, das sött mer us Prinzip nöd esse...) mitbracht. De Fritig bin ich den dra, de Robert het mer Chäs und Bündner-Fleisch (das het sich de eint Franzos gwünscht, das gebs in Frankrich au us de Schwiz importiert, aber s seg extrem tür) sowie Schoggi und min Lieblings Wis-Wi, Zürcher Staatsschriber', bracht. D.h. ich muess nur no en Zopf bache und sött denn guet d Schwiz da verträte chöne :)

Am Fritig Abig han ich nach Jahre s erscht mal wider en Fuessballmatch gha. Mir hend zwar 3 - 6 verlore, aber chum es Team het sich selber so agführt wie mir ois :)

Am Abig denn bin ich anere Halloween Party gsi, wo hauptsächlich vo und für d ESA YGTs (Young Graduate Trainees) gsi isch. Det hi bin ich mit em Jon, wo zerscht als Samuel L. Jackson us 'Pulp Fiction' gange isch, und sich denn in Will Smith us 'MIB' verwandlet het won em de Schnauz z müäsam worde isch :) Ich bi als Pirat gange (das Wuchenend gits nomal ä Halloween party, demal vo de Studente im Hus won ich wohn, ich versuech denn e Foti vo mim 'Pirate-Kostüm' z mache)

Am Wuchenend het mich denn 'endlich' de Robert bsuecht - needless to say, dass es es wundervolls Wuchenend (sogar mit enere extra Stund :) ) gsi isch. :)