Halloween Woche

Die Wuche isch sehr schnell umegange, und s git eigentlich au nöd vil z verzelle, aber ich ha denkt, wenn ich chli öfters updati denn werded d posts nöd immer so lang... :)

Am Dunschtig bin ich bi mim dütsche Arbeitskolleg gsi um wi gseit en Zopf z bache. Das isch eigentlich recht guet gange, und mir hend wärend de Zopf im Ofe gsi isch endlich d Fortsetzig vo Nightwatch (Nochnoy dozor), Daywatch (Dnevnoy dozor), gseh. De Zopf, de Staatsschriber Wi, es Tessinerplättli, es Päckli Bündnerfleisch, 2 Chäsplättli und Pralines han ich denn am Fritig au als Schwizer Zmorge, wo denn wägem Wi eher als Aperitiv igno worde isch :), mitgno. D Lüt sind begeischteret gsi, vorallem vom Bündnerfleisch und vom Zopf, wills da ebe nöd so würklich guets Brot git (hend zumindescht de dütsch, mini französische Arbetskollege und ich s Gfühl :) )

Ich ha am Fritig Namittag au e noii Ufgab, zumindescht für de Moment, übercho. Da mis Modell fertig isch, aber d boards no nöd laufed, bin ich beuftreit worde ganz es eifachs Modell (sprich nur e leeri Funktion wo zyklisch ufgruefe wird) z schribe, und das denn ufemene Simulator zum laufe bringe, demit mer denn s Modell nach und nach komplizierter mache, und dadebi usefinde chönd, wiso d boards nöd laufed. Natürlich funktioniert nöd mal das eifache Modell... :) Am Abig (20:15, s isch also wideremal en sehr en lange Arbeitstag worde...) hemer en Fuessball match gha. Am Fritig hemer au endlich oisi trickots übercho (inkl. Socke! :) ), da hemer natürlich grad müäse Fotene mache.

Am Abig hemer denn da im Hus no en Halloween party gha, ich bi eifachheitshalber nomal als Pirat gange. Leider sind demal nöd so vil Lüt verchleidet gsi, so dass mini 2 Kolleginne und ich, wo sich us oisere Gruppe als einzigi verchleider hend, chli luschtig vorcho sind :) Aber wenigschtens hemer ois as Motto vo de Party ghalte :)

Am Wuchenend han ich wi immer am Samschtig Morge Iaido-Training gha, und denn simer 3 mal is Kino, will a dem Wuchenend Leiden Film Festival gsi isch. Am Samschtig Namittag hemer 'Animatie' gseh, das sind 18 Churz-Animations-Film gsi vo noie Holländische Künschtler. Am Abig simer go 'American Gangster' luege. De Film isch sehr guet gsi, aber es isch recht lang gange bis mer endlich drus cho sind um was es gat, will d handlig chli konfus gsi isch, und s Englisch au recht schwer z verstah gsi isch, leider hend au di Holländische Untertitel nöd vil bracht :) Am Suntig simer nacheme usfüärliche Brunch go 'Daywatch' luege (ja, nomal :) ). Am 4i han ich denn no e Schwedischi Kollegin zumene 2h Kafi troffe (das isch s schöne da, mer cha sich für alles so vil Zit ne wimer wett :) ). Si isch da a de Universität und studiert mit mine Nachberinne zeme 'international law'. Eis vo de Fächer wo si beleit isch au 'Aerospace law', und si het sogar gwüsst, dass mir i de Schwiz es Zyklotron hend!... :) Und am Abig het widermal chli WOW gamed werde müäse (vorallem nachdems mit minere Counter Strike unverträglichkeit immer nanig besser worde isch :) ) ... :)