Erster Arbeitstag

Eigentlich han ich ja erscht am Mittwuch welle update, aber da ich bis denn sicher scho alles wider vo hüt vergesse ha, schrib ich jetzt churz echli öpis, und hoff morn chli Fotene bi de Arbet mache z chöne. Am Morge muess ich da scho rel. früä uf de Bus, will de e halb Stund zu de ESA brucht, und denn isch mer det erscht bim Igang und het sicher nomal 5 min zum Hauptgebäude und vo det nomal mind. 5 min. zu mim Büro :)

Als erschts sind en Norweger wo hüt mit mir agfnage het und ich vo de HR managerin begrüässt und chli über ESTEC informiert worde. ESTEC isch wi gseit sehr gross, und het unter anderem en eigni Poststell, e Bank sowie en grossi Sportalag. Nachdem si chli mit ois gschwätz het het mich d Sekretärin vo de Division won ich defür schaff abgholt. Si het mich denn de ganze Division vorgstellt, wodruf mich natürlich scho 2 gfrögt hend öb min Vater au für d ETH schaffi, si kennid en Herr Schaufelberger vo de ETH :) So eilt eim d Familie vorus :)


Denn bin ich zu mim Chef is Büro, en sehr nette Franzos (ich schrib den spöter nochli über de Umgang im team) wo mir mal recht usfüärlich erchlärt het was d Software Section vo de ESA gnau macht, wie das mit de contracts lauft, was langzit Gol sind und mich denn natürlich gfrögt was ich denn da gern mache wür. Da ich gmeint ha es stöchi eh fescht was ich da machi han ich natürlich kei Antwort gha und da hämer halt chli über mis CV gret, und dass er au mal Latin i de Schuel gha heg, letschti wider mit eme italienische Kolleg heg welle uf latinisch korrespondiere, s aber nöd so guet gange seg :) Min Chef het no gmeint da findid die Wuche so Workshops über 'Integrated Modular Avionics', 'Control Systems H/W', 'Avionics Reference Architectures', 'Automatic Control Needs for Space Applications', 'Next Generation Processor for On-board Payload Data Processing Applications' und 'Atmospheric Re-entry GUIDANCE & CONTROL Needs and Challenges' statt, won ich vilicht au mal Luscht heg zum Spass z bsueche. Er het mer es Programm geh, die Workshops gönd vom Morge am halb 9i bis am Abig am 6i inkl. Aschlüssendem Cocktail :) Ich weiss also jetzt scho won ich die Wuche z finde bin :) Nachdem Gspröch het er mich den zum Yuri us de Ukraine bracht, wo mir zerscht wider usfüärlich brichtet het was er denn so machi, und was er sich für mich für en Arbeit vorgstellt heg. Morn muess ich denn die Ufgab no mit öper anderem bespräche wo bis und mit hüt no i de Ferie isch. Sobald ich denn definitiv weiss was ich mache muess, post ichs uf de Site.


Relativ gli druf abe simer dänn go esse. S het da e grossi Mensa und mir hend Schrimp- Spiessli, Herdöpfel, Erbsli sowi als Bilag Salat vom Salatbuffet gno, und zum trinke hets unter anderem ganz vili frischi Säft gha, ich ha en Kiwi Saft gno :) De ganzi Spass het nur 4 Euro 25 koschtet, minere Meinig na nöd schlecht für es Personal Restaurant. Nachem esse het ois min Chef zu Kafi und Schoggi iglade, woruf e grossi Diskussion losgange isch wer welli Schoggi produziert. Interessanterwis händ all gmeint es anders Land produzieri d Schoggi als si selber. Ich ha gmeint Frankrich produzieri Suchard, min frz. Chef het gmeint Suchard seg us de Schwiz. Denn han ich gmeint Toblerone seg vilicht italienisch, de Dütsch het gmeint s seg französisch und de Italienner het gmeint s segi schwizerisch :) Einzig Lindt han ich gmeint seg doch sicher schwizerisch, aber de Dütsch het gmeint Lindt chömi doch us Dütschland :) Uf jede Fall sind Cailler, Lindt, Suchard, Nestlé und Toblerone nach Wikipedia alles schwizer Marke :)

Recht vil spöter simer denn wider go schafe, aber ich ha scho am 2 en Infoalass zu Sicherheit am Arbetsplatz gha. Det isch verzellt worde was alles so gförlich seg, und wie si mit em Asbest-Problem wos händ umgönd :) De Griech nebed mir het gfrögt was denn s Problem mit Asbest seg, und nachdem ich lang und breit erchlärt ha was das segi het er nur gmeint, er kennis scho, aber si benützid Asbest in Griecheland hüt no :) Am 3 han ich denn es appointment uf de Bank gha, will jede d bi de ESA bi dere Bank en acount für de Lohn brucht. Das isch relativ eifach gange und ich ha gratis es Konto übercho, wil ich als graduate dure cho bin, da ich ja praktisch scho en bachelor ha :)

Denn bin ich nochli go mich iläse. Es stat scho min Name a de Tür vo mim Büro won ich mit eme Franzos teil und dem Typ wo ebe no i de Ferie isch. Ich glaub er heisst Maxime und ich ha de ganz Morge lang gmeint es segi eini, bis mal öper mit 'he' über ihn gret het :) Ich han au scho en eigni Telefon Nr. nur en Computer han ich no nöd :) Und das i de software engineering and standardisation section :) Das wär denn min erschte Tag gsi, wie gseit Fotene tuen ich asap dem Text hinzuefüäge...